Avaruna Egede aappanilu Nanortalimmi 2013-imi namminersortutut aallartipput – tassanngaanniillu assigiinngitsut aallarnisartarsimallugit.
Siullermik grillkioskimiit, atisaarniarfimmut, cafémut, South Greenland Boat Charter 44’mut – massakkullu Souvenir Shop Nanortalik ingerlallugu.
Avarunap oqaloqatiginerani oqaatigaa aallartitsinissamut tunngaviusartut tassaasartut soqutigisat aallaavigaligit illoqarfigisami amigaatigineqartut.
-Pilersitserusunneq uanniittuaannarnikuuvoq. Suut illoqarfitsinni amigaataappat? Piffissami soqutigisakka aallavigalugit pilersitsineq ineriartortitsinerlu nuannarisarpara. Suli meerartaarnata atisanik nuannarisaqartorujussuuvunga – periarfissamillu nassaariaratta atisaarniafimmik ammaalluta.
Atisaarniarfik piffissamik eqquilluarnikkut ammarpoq, kommunimiit illu tuniniarneqarmat taanna pisiarivaat, atisaarniarfillu tassani ammarlugu. Illulu tamaat atorluarnerusinnaasoq takusinnaasimavaat, taamaalillitik café’mik aamma ammaallutik.
Pilersitsineq, ineriartortitsineq ataatsimoorsitsinerlu
Café ammarmat takornariat naapinneqartalerput. Nanortallip eqqaani pinngortitarsuaq imaanaanngitsoq kusanartigisoq, sumiiffimmi takornarialerisut amigaataasut paasiartuaalersimavaat. Tassanngaanniillu takornarialerineq aallartinneqarpoq.
–Takornariaqarnerup silarsuaannut appakaanitsinni angallassissutit akuerisat amigaataapput, South Greenland Boat Charter 44 aallartipparput, ullorlu manna tikillugu ingerlallugu, Avaruna Egede oqaluttuarpoq.
Umiarsuit takornariartaatit tikerarluartalermata eqqarsaatigisimavaa qanoq tamanut iluaqutaasumik ammaasinnaanerlutik, taamaalilluni suliffiata Souvenir Shop Nanortalik ammarpaa, maannalu Avarunap taanna ingerlataralugu.
Niuertarfimmi eqqumiitsuliortut sanaluttartullu sineriak tamaat pisiniarfigisarlugit Avaruna Egede oqarpoq, saniatigullu nammineq isumassarsiaminik sanaartortitsisarluni.
-Niuernermi kisiat eqqarsanngikkaluarluni sumiiffimmi kikkunnit tamanit iluaqutaasinnaasut ujartornissaat anguniartarpakka, Avaruna oqarpoq.
Soorlu ukiualuit matuma siorna nappaassuarmut kræftimut eqqugaasunut katersuiniarneq Avarunakkut aaqqissornikuugaat.
“Ataatanniit pigivakka”
Pilersitserusunneq, inerisaarusunneq aaqqissuerusunneq Avarunap kinaassusianiippoq, meeraaneraniilli ilisarnaataasarsimalluni. Igalikumi savaateqarfimmi peroriartorpoq, meeraanerminiilli nunaqarfimmi aaqqissuusinissaq nuannarisarsimaqaa.
-Nunaqarfitsinni taparnermik takutitsineq aaqqissornikuullugu eqqaamavara, suli iluamik allassinnaananga. Taamanili isumassarsiamiit piviusunngortitsinissamut aaqqissuinermullu soqutigisaqartarlunga eqqaavara, Avaruna oqaluttuarpoq.
Avaruna Egede ilaatigut peqatigiiffimmi Nanortalik Asasarami peqataavoq, tassanilu siunertaalluni tikikkuminarsaanissaq. Tikeraanut nunaqavissunullu iluaqutaasussanik ineriartortitsiviusoq. Tassingalu aallarnisaanermi tunngaviuvoq Nanortalik illoqarfinni avatangiisiginnersaat ilagimmassuk, illoqarfittaalu inerisagassarpassuaqarluni.
Avaruna arnaavoq akisussaaffimmik tigusisinnaasoq, ataatsimoorutissanik ujartuisinnaasoq Nanortalillu tikikkuminartuunissaanik suliaqarusuttoq.
Innovation South Greenlandimi arnat inuussutissarsiornikkut maligassuiusut decembarip ingerlanerani saqqummiuttarpagut. Arnat akisussaaffeqartut, suliffinnik pilersitsisut kujataanilu ineriartortitseqataasut saqqummiuttarpagut, taakkunannga Avaruna Egede peqataalluinnarpoq.
