Elna Jensen 1999-imi Narsarsuarmut tikippoq angallannermi ikiortitut suliartorluni. Ullumikkut kujataani ima akuulluartigaaq Kangaatsiameersuunera eqqarsaatigineqarneq ajorluni. Soorunami kujataarmiorpalunnginnera maluginiartarparput, Elna Jensenili eqqaaneqaraangat savaateqarfik Sillisit eqqaaneqartuaannarpoq.
– Ilaanni takorloortarpara Tunulliarfimmi qimusserlunga. Motorip nipaa tusaanagu ingerlaarneq kiffaanngissusermik minguinnermillu misigititsisartoq eqqaasarpara, nunalumi manna qimusserfigissallugu soorlu nuannissasoq, Elna Jensen oqarpoq.
Elna Jensen 48-nik ukioqarpoq Kangaatsiameerpoq meeraallunilu qimussertarluni – ataataminit sungiusarneqartarnermigut. Ullumikkulli savaatilik inooqatigaa marlunnillu paneqarlutik erneqarlutillu.
Elna Jensen arnat inuussutissarsiortut nukittuut maligassaalluartut ilagaat — savaateqarfimmik ingerlatseqataajutigalunimi, namminersortuuvoq siulersuisunilu ilaasortaalluni. Kujataani ukiut 25-it sinnerlugit najugaqarnermini assigiinngitsunik suliniutinik aallartitsisarsimavoq, nunaqarfimmilu inuiaqatigiit kulturikkullu kingornussassaminnik ineriartortitseqataasarluni.
Kujataamiu – avannaarmiorpaluttoq
Kujataani inooriaaseq ataqqingaarlugit Elna savaatilittut ingerlatseqataavoq, ulluinnarnilu savaatilittut ingerlatseriitigaluni, takornarialerisarpoq siulersuisunilu ilaasortaaffimmini suleqataasarluni. Takornarialerinermi unnuisarfik (vandrehjem) – Sillisit Hostel, illuaqqallu ingerlappai saniatigullu aamma Qassiarsummi Café Thorhildurimik ingerlallugu. Suliffeqarfiit suliffissanik pilersitsisut, nunarsuarmit tamarmeersunik tikeraartitsisut kujataatalu kulturikkut kingornussaanik ingerlatitseqqiisut.
– Namminersortutut ingerlatsinermi kisiat suliffeqarfiup inerisarnissaanut aallussinngilagut. Sumiiffimmi akisussaaffimmik tigusineruvoq, tikikkuminarsaaneq oqaluttuarisaanertaalu pingaaruteqangaartoq ingerlateqqikkusuttuuarput, Elna Jensen oqarpoq.
Elna arnaavoq sapiissusilik aalajaatsuusimavoq, tassami coronap nunarsuarmi tuniluunnera pissutigalugu piffissami nalorninartorsiorfiusumi aningaasatigullu tatineqarfiusumi Café Thorhildur tamakkiisumik pigilerpaa. Ullumikkut café ukioq kaajallallugu ammasinnaavoq – tamannalu inuiaqatigiinnut takornariaqarnermullu pingaarutilittut inissisimavoq.
Savaatillit peqatigiiffiani siuttuuneq ilaasortaanerlu
Elna Jensen savaatillit peqatigiiffianni SPS-imi ukiuni marlunni siulittaasuusimavoq, juunimi juulimilu peqatigiiffik ulapaarfiusaqimmat saniatigullu takornariat tikerarfiata nalaaniittarmat marloqiusamik ulapaarneq imaanaanngissimaqaaq. Taamaammat siulittaasutut qinigassanngorteqqinniarnani aalajangersimalluni – ullumikkulli suli siulersuisuni ilaasortatut sulivoq.
– Savaatillit akornanni pisartut annerit juunimi juulimilu pisarmata, tassani aamma takornarianik sullissineq ulapputigisarpara. Taamaattumik suliassat oqimaatsut marluk suliarinissaat artornarsimavoq, taamaattumik siulittaasutut qinigassanngorteqqinniarnanga aalajangernikuuvunga, siulersuisunilu suleqataaniarlugu aalajangernikuuvunga, siulersuisunimmi suleqataaneq nuannaraara, Elna Jensen oqaluttuarpoq, taanna aamma Innovation South Greenlandimi siulersuisunut ilaasortaavoq nangillunilu:
– Siulersuisuni ilaasortaaneq periarfissaalluarpoq siunissami pissutsinik pitsaanerulersitsinissamut, aamma kinguaariinnut tulliuttunut, taanna oqarpoq.
Elna Jensen avannaani meeraanermini qimussertarneq ilitsoqqussaralugu – kujataani savaatilittut, aallarnisaasutut inuussutissarsiornermilu aqutsisutut ingerlanera maligassiuineruvoq imaanaanngitsoq, inuttut inuiaqatigiinnullu tunniussassaqarusunnera naleqarnerulersitsisarneranut assersuutissaalluarpoq.
Innovation South Greenlandimi arnat inuussutissarsiornikkut maligassuiusut decembarip ingerlanerani saqqummiuttarpagut. Arnat akisussaaffeqartut, suliffinnik pilersitsisut kujataanilu ineriartortitseqataasut saqqummiuttarpagut, taakkunannga Elna Jensen peqataalluinnarpoq.
