“Suliniutit angisuut aningaasanik nussuisarput, suliniutillu mikisut inunnik nussuisarlutik.”
Pisortaq Miki Jensen qanittukkut Reykjavikimi Arctic Circle Assembly-mut peqataavoq, tassanilu suliffeqarfinni nutaaliornermik suliaqartuni pisortat nunanit assigiinngitsuneersut peqatigalugit oqalliseqataalluni. Oqallinnermi nunatsinni nutaaliorneq inooriaasitsinnut ilaajuaannarsimasoq erseqqissaatigaa.
– Kulturerput nutaaliortuujuaannarsimavoq. Ilaatigut qajaq pilersissimavarput, seqinersiutit qimussillu – nunagisatsinni uumanissarput qulakkeerniarlugu. Ullumikkut nutaaliorneq inuuniarnermut tunngassuteqarneruvoq, tunisassiornermik aaqqiissutissanillu mutiunerusunik nassaarnissaq pingaaruteqalersimalluni. Amerlanertigut atortut killeqartunik aallaavigalugit, Miki ilaatigut Linked In-imi taama allappoq nangillunilu:
Kujataani tamanna ersarippoq. Savaatillit maligassiuilluarput. Inuit assigiinngitsorpassuarnik piginnaasaqartuupput.
Ilaqutariiaqqat:
- Savaateqartarput
- Erngup nukinga atorlugu nukissiorfimmik pilersitsisarput
- Takornarianut unnuiffissaqartitsisarput
- Naatitanik naatitsisarput
- Aalisarnermik piniarnerlu aallunneqartarpoq
- Namminneq illuliortarput maskiinatillu iluarsaasinnaasarlugit. Avinngarusimasunilu najugaqartarlutik
Mikip aamma erseqqissarpaa ukiuni aggersuni aningaasaliissutit pingaarnerit tassaaginnassanngitsut aningaasat milliardilikkaanik nalillit, tassaassappulli nunaqavissut suliffissaqartitsisut, namminerlu ineriartortitsisinnaasut, isumassarsisitsisut piginnaanernillu upperinnilersitsisartut.
