Qaqortup mittarfia 2026-mi upernaakkut ammarpat kujataani angalanerit attaveqaatillu allanngortinneqarumaarput, tamannalu innuttaasunut takornarianullu nutaamik atugassaqartitsissaaq. Innovation South Greenlandip misissuinerata takutippaa nunap immikkoortuani takornariaqarneq siuariartortussaq, taamaammat siniffissat neriniartarfiillu amerlanerusut amigaatigineqalertussaassasut.
Air Greenlandip aamma Icelandairip nalunaarutigaat 2026-mi aasakkut Qaqortumut timmisartuussisarnertik amerliniarlugit. Air Greenland takornariarfiunerpaaffiusumi sapaatip akunneranut 17-eriarluni Nuummit Qaqortumut timmisartuussisalerniarpoq, Icelandairillu Keflavikkimiit sapaatip akunneranut sisamariarlutik timmisartuussisalerniarlutik.
Tamatuma kingunerisaanik timmisartut kujataanut tikittartut 15,9 procentimik amerlissapput, taamaalillunilu nunap immikkoortuanut tikeraat amerlanerulersinnaallutik.
Narsarsuarmi misilittakkat takutippaat timmisartumik angalasut 70 procentii takornariaasartut. Taamatut ingerlaannartoqassappat Qaqortumi unnuisartut ukioq manna siullermiilli amerliartupiloornissaat naatsorsuutigineqarsinnaavoq.
Sumiluunniit unnuiffissaaleqineq
Misissuinerup takutippaa Qaqortumi ullumikkut 143-nik ineeraqartoq, taakkuali affaasa missaat takornarianut killilersugaapput, soorlu ilinniarnertuunngornianut imaluunniit ininik attartortittakkanut.
Takornariaqarneq taama ingerlaannassappat 2031-p tungaanut unnuiffissat 30-60-it amigaatigineqassapput, qanoq sukkatigisumik ineriartortoqarnera apeqqutaalluni.
-Sulinerit maanna aallartittariaqarpugut oqallinnermiit iliuuseqartoqartariaqalerpoq, borgmesteri Malene V. Rasmussen oqarpoq.
Ineriartorneq tamanna unamminiarnartuullunilu periarfissaasoq, ISG-mi pisortap Miki Jensenip erseqqissaatigaa:
– Qaqortumiit takornariat amerlanerusut tikissinnaalernissaat pissusissamisoorpoq, kisiannili nunap immikkoortuani tamarmi periarfissarpassuaqarpoq. Maanna ataatsimoorluta siniffissanik neriffissanillu pilersitsisariaqalerpugut kujataalu tamakkerlugu misigisassaqartitsiffissanik pilersuilluta.
Qaqortumi mittarfik ammarpat kujataani tamarmi angallannermi nutaamik periuseqalissaaq periarfissanillu nutaanik pilersitsisoqassalluni. Periarfissat tamakkiisumik atorluarneqarsinnaassappata kommuni, inuussutissarsiortut najukkamilu ingerlatsisut suleqatigiilluartariaqarput takornariaqarnermut sinaakkutinik pitsaasunik pilersitsiniaallutik, tikeraartunut innuttaasunullu iluaqutaasumik.
