Qaqortumi timersortarfiip eqqaani “pinnguartarfissuaq” nutaaq (Qaqortoq South Park), skateboarderfissalik, basketballertarfilik, qallortarfilik – timillu aalatinnissaanut periarfissanik ulikkaartoq naammasseqqammerpoq.
Suliniutip piviusunngornissaanut – isumassarsiaq messengerikkut allaqatigiittarnikkut aallartinneqarpoq. Gruppimi skateboardertarneq pillugu allaqatigiittoqartarpoq isumassarsianillu avitsiffiusarluni.
Isumassarsialli alliartupiloorput…
Søren Mortensen timersortarfiup eqqaani skateboarderfissamik titartaavoq, taamaasillunilu suliniummi suleqataarusuttut amerliartupallallutik. Taamaasillunilu peqatigiiffik Qaqortoq South Park pilersinneqarluni.
Inuussutissarsiortut suliffeqarfiillu peqatigalugit sumiiffik ineriartortinneqapallappoq. Massakkullu anguniakkamiit anginerulluni piviusunngorsimalluni. Tassami South Park maanna skateboardertarfiinaanani massakkut basketballertarfeqarpoq, qallortarfeqarpoq – pinnguartarfeqarluni ataatsimoorfiulluarlunilu.
Suliniut taama annertutigisoq piviusunngorsinnaasimavoq kajumissutsimik suliaqartut, suliffeqarfiit innuttaasullu suleqatigiilluarnerisigut.
Søren Mortensenip Qaqortoq South Parkimilu siulersuisut sanaartortitsisut suliffeqarfiillu takorluukkamik piviusunngortitsinissamut tapersersuisut tamaasa qutsavigingaarpaat.
Qaqortoq South Parkip takutippaa isumassarsiaq, titartagaq ataatsimoornerlu ineriartortinneqaraangata qanoq pisoqarsinnaanera. 60° North Greenland, KJ Greenland, RAL, HK, Hotel Qaqortoq, Sermeq Helicopters, Inuplan, Masanti, Sydgrønlandsk El, Stark, Permagreen aamma Kunguak ilaatigut Qaqortoq South Parkimik tapersersuipput.
Skateboardissaguit løbehjulilluunniit eqqaamallugu hjelmeqarnissat.
