Kujataani sumiiffinni arfinilinni eqqakkat 13 tonsit piiarneqarput
Assit: Siu-Tsiu
Aasap ukiallu ingerlaneranni Innovation South Greenland kujataani sumiiffinni arfilinilinni Siu-tsiu suleqatigalugu immap eqqaani saliisitsivoq.
Inuusuttut Siu-Tsiumeersut Kujataani sumiiffinnit assigiinngitsunit arfinilinnit eqqakkat katillugit 13,1 tonsit poortarujussuarnut qaqortunut 53-inut katersorpaat, maannalu eqqakkat taakkua avatangiisitsinniit peerneqarsimalerlutik.
Qaqortumi, Narsami, Eqalugaarsuarni, Alluitsup-Paani, Igaliku-Kujallermi Igalikumilu saliisoqarpoq, sissiukkani ilaatigullu aalisartut piniartullu pequtaasiviisa eqqaani saliisoqarluni. Salitassat sumiiffiit ilaanni annikinnerupput sumiiffiillu ilaanni annertunerullutik.
Erik Kielsen, Innovation South Greenlandimi aalisartunut piniartunullu siunnersorti, saliinermik aaqqissuussisuuvoq, saliinerlu Arctic Cleanup-imit aningaasalersorneqarpoq.
Eqqakkat tamarmik nalunaarutigineqarput
Eqqakkat tamarmik assilillugit suullu eqqarneqarsimanersut nalunaarutigineqartarput. Qaqortumi 1,5 tonsit katersorneqarsimapput, Narsami 5 tonsit katersorneqarsimapput. Narsami saliineq immikkut issimavoq, tassami najukkami ataatsimiititaliap innuttaasut tamaasa ikiuukkiartortippai, katersuinerlu ulluni marlunni pingasunilu ingerlanneqarpoq. Eqalugaarsuit, Alluitsup-Paa, Igaliku-Kujalleq aamma Igaliku 6,5 tonsinik katersuiffiupput.
Inuusuttut saliinerminni ilaatigut kabelinut trommili immamiittoq, savimerngit angisuut assigiinngitsut asaannarminnik immamiit qaqissimavaat. Eqqakkallu ilaatigut makkuupput: kisat, kalunnerit savimerngit, qassutit, qilerutit, umiatsianut assiaquterujussuit, puttaqutit, gummibådeq, puussiarsuit aaqqatillu plastikkit.
Inuusuttut akisussaasusilimmik takutitsisoqarnissaa noqqaassutigaat
Inuusuttut pinngortitamik immamillu paarsinerulernissamik kajumissaaripput.
- Inuit pissusilersornerat apeqqutaavoq, taamaattumik neriuutigaara inuit immamik pinngortitamillu eqqarsaatiginninnerulissasut paarsinerulerlutillu, Arnfred Karlsen Siu-Tsiumi inuusuttut ilaat oqarpoq.
- Sumiiffinni assigiinngitsuni pinngortitarsuaq alutornangaartoq takuarput, pinngortitarlu kusanarmat imartatta avatangiisittalu paarilluarnerunissaannut kajuminnarnerulersitsivoq, Aron Stach Siu-Tsiumi inuusuttut ilaat oqaluttuarpoq.
- Sikaritsit kimmivikuinik ulikkaarpoq plastikkillu amerlaqaat. Taamaammat iliuuserisartakkavut eqqarsaatiginerusariaqarpagut, Mark Petersen Siu-Tsiumi inuusuttut ilaat oqarpoq.
- Inuit eqqaamasariaqarpaat pinngortitaq allanngorartuaannarmat. Pigisatik pinngortitamut qimakkaangamikkit sukkanerpaamik sumiiffissaanut igipallattartuugunikkit pitsaanerpaassagaluarpoq. Ilaatigummi soorlu qassutit nunamut akulerussimasorujussuusarput, taakkulu piiaruminaattorujussuullutik, Lars-Ole Knudsen, Siu-Tsiu-mi sulisut ilaat taama oqarpoq.
Siu-Tsiu, Arctic Cleanup aamma Innovation South Greenland ataatsimoorlutik avatangiisitta mingutsitsiffiunnginnerulerneranik kinguneqartitsipput. Suliniut avatangiisitsinnut mingutsitsinerunnginnermik kinguneqartitsivoq, sumiiffinni qanimut suleqatigiinneq inuusuttullu piumassuseqartut peqatigineqarnerisigut. Tamannalu maligassiuinermik takutsitsineruvoq.