Icelandair Midatlantic Tradeshow tassaavoq takornariaqarnikkut naapeqatigiinnermi niuerfik.Ukiut marlukkaarlugit tamanna Reykjavik, Islandimi pisarpoq. Aqqissuussisarnerup siunertaraa Amerikap Avannaani Europamilu inuussutissarsuitigalugu takornariaqarnermik aaqqissuussisartut ataqatigiissinneqarnerulernissaat, Tassani imminut nammassinnaasumik tikinneqarsinnaasut akornanni pitsaanerusumik niueqatigiissinnaanerit anguniarneqarluni. Aamma tassani angalatitsinermik niuertut, Icelandairip silaannakkut angallannikkut attaveqaataai aqqutigalugitt suliaqartut, pitsanngortinnissaat anguniarneqarpoq. DMO-tut ISG ateq Visit South Greenland atorlugu peqataasarpoq, Tassani kujataa immikkut takutinniarneqartarpoq tikiffissatut immikkuullariiivissutut aammalu takornarialerisut kujataaneersut angalatsitsinissanik misigititsinissanillu neqeroorutaat avammut saqqummersinneqartarput.Saniatigut ISGp takornarialerisut aaqqissuussami peqatasussat kujataaneersut piareersarnermi ikiortarpai Peqataasut immikkut 25 miss. naapeqatigiinnerni ataatsimeeqateqartarput.

Anguniakkat pingaarutillit: Piffinnit aallaveqarnissaq, ukiup ingerlanerani takornariaqartarnerup sivitsornissaa, nioqqutissanik ineriartortitsineq, nunat tamat akornanni avammut nittarsaaneq.

ATTA AdventureELEVATE tassaavoq takornarialerisunut aaqqissuussaq, Adventure Travel Trade Associationimit aaqqissuunneqartartoq. Taassumap siunertaraa imminut nammassinnaasumik takornarilerinermik ilisimasanik aammalu mingutsitsinngitsumik suliniutinik avitseqatigiinneq. Ukiut tamaasa nunani assigiinngitsuni tamanna pisarpoq, Amerika Avannarlermi aaqqissuunneqarnerusarluni.Tassani naapeqatigiinnermi, suliniaqatigiiffiup ATTAp ukiumoortumik niueqatigiinnikkut naapeqatigiissitsineraniit Adventure Travel Worl Summitimit, sukumiinerusumik qaninnerusumillu aqqissuussisoqartarpoq. 2023-imi AdventureELEVATE Portand- Maine-imiittumi aaqqissuunneqassaaq. Tassani ISG arlalinnik suleqateqartareerpoq, taamaattumillu tassani angalalluni peqataaneq suliniutinut assigiinngitsunut atorneqarsinnaapput.

Anguniakkat pingaarutillit: piffinnit aallaaveqarneq, umiarsuarujussuit atorlugit takornarissat aaqqissuunneri imminnut akilersinnaanissaat, nioqqutissanik ineriartortitsineq, nunat tamat akornanni avammut nittarsaaneq

Vestnorden tassaavoq takornarialerisut akunnerminni niueqatigiittarfiat. Tamanna ukiut tamaasa sept./okt.-imi pisarpoq, aaqqissuussinerillu Nunani Avannarlerni Killerni, Savalimmiuniit, Kalaallit Nunaanniit imal. Islandimiit aaqqissuuneqartarpoq, 2023-imi pisussaq Reykjavikimi, Islandimi pissaaq. Naapeqatigiittarnerup siunertaraa nunat taakkua pingasut avammut nittarsaannissaat, taakkualu imminnut angalanikkut aamma angalanermi ataatsimi takornariarfiginissaannut periarfissagissaarnerat saqqummiunnissaat. Nunammi taakkua tikinneqarsinnaaneri aammalu suliniutaat assigiissuteqarmata. Peqataasut immikkut ataatsimiinnerit 26-it tikillugit ataatsimeeqateqarsinnaasarput, taakkualu tikittarfiit assigiinngitsut ataatsimeeqatigiinnerisa imminut akilersinnaasumik niueqatigiinnermik pilersitsisarput. DMO-tut aaqqissuusaasutut, ateq Visit South Greenland atorlugu, ISG aaqqissuussami peqataasarpoq. Tassani kujataa takornariarfissatut immikkuullarissutut takutinniarneqartarpoq aammalu piffinni takornarialerinermik suliaqartut avammut nittarsaanneqartarlutik. Saniatigut ISGp piffinni takornarialerinermik suliffeqarfiit aaqqissuussamut peqataanissaanut piareersaallugit ikiortarpai.

Anguniakkat pinngaarutillit: piffimmit aallaveqarneq, ukiup ingerlanerani takornariaqarnerup sivitsornissaa, niuerutissanik ineriartortitsineq

Wool in the North tassaavoq ukiuni arlalinni, Savalimmiut, Kalaallit Nunaata, Islandip Norgellu akornanni projektimut tunngatillugu suleqatigiiffik. Taanna NORA(Nordisk Atlantsamarbejde)-imit aningaasalersornaeqarpoq. Annermik Islandi tassani ataqatigiissaarisuuvoq. Suleqatigiinnerup siunertaraa savat meqqui, savat meqqui atorlugit tunisassiat, meqqunut tunngatillugu aaqqissuussinerit savaatilinnit, eqqumiitsuliortunit, katersugaasivinnit, tunisassiorfinnit assigisaanniillu aaqqissuussinerit atorlugit takornariaqarnikkut ineriartortinnissaq. Meqqut atorlugit takornariartitsisarnerup meqqunik naleqartunik eqqaaginnartarneq pinaveersimatittarpaa aammalu nunaateqarneq savaateqarnerlu ikorfartertarlugu. Ukioq 2023, projektip ukiuata pingajussaa naggataalu: tassani aaqqissuussamik angalatitsinerit(pakkerejser) ukiut siuliini sananeqarlutillu misiligarneqarsimasut, niuernikkut suleqatigiinnut tamanut tunniunneqassapput. Taakua avammut saqqummiunneqarumaarput, ukiamullu atimik nuersagassiamik/annoraaminiliassamik ilisarnartumik atserlugit tunniunneqarumaarlutik.

Anguniakkat pinngaarutillit: piffimmit aallaveqarneq, ukiup ingerlanerani takornariaqarnerup sivitsornissaa, niuerutissanik ineriartortitsineq, UNESCO & nunatsinni takusassat immikkuullarissut, avammut nittarsaaneq, pitsaassutsip imarisai

Ukioq naallugu kujataanut kujataaniillu avammut silaannakkut attaveqarnissat, Icelandair Air Greenlandilu qitiutillugit, suli suliniutigineqarput. Ukiuni makkunani aasaanerani kujataaniit kujataanullu silaannakkut avammut aqquteqartarpoq. Attaveqaatit soorunami imminut akilersinnaasuussapput, ilaasorisartagassallu tassaassallutik nunatsinneersut takornarissallu. Tamaammat takornariaqarnikkut neqeroorutit ineriartortinneqassapput, aamma aaqqissuussinerit ilivitsukkaat, ukiakkut, ukiukkut upernaakkullu ineriartortinneqassapput. Saniatigut kujataani ukiuunerani takornariaqarneq siuarsarneqassaaq, minnerunngitsumik 2021-mi filmit marluk, isumassarsiornermik avammullu nittarsaanermik imallit, eqqarsaatigalugit. Taakkua filmit ukiuunerani tikittartussat amerlinissaat siunertaralugit sananeqarnikuupput.

Anguniakkat pinngaarutillit: piffimmit aallaveqarneq, ukiup ingerlanerani takornariaqarnerup sivitsornissaa, nioqqutissanik ineriartortitsineq, avammut nittarsaaneq, pitsaassutsip imarisai

Ukiuni kingullerni Naalakkersuisut takornariaqarneq tapersorsorsimavaat. Tassani nunap immikkoortuini tamani takornariarfissatut ornigassaqqissut atortutigut pitsanngorsaavigineqarsimapput. Tassuunatigut nunap immikkoortuini tamani takornariarfissatut ornigassaqqissut immikkorluinnaq inissisimaneri saqquminerulersinneqarsimapput. ISG piffinnik arlalinnik siunnersuuteqarsimavoq, aaliangiinerillu Greenland Vistor Centerimit pisimavoq. Taakkua takornariarfissatut ornigassaqqissunik taaneqartarput, maanilu kujataani tassaallutik: Gardar Igalikumi illukut, Brattahlid Qassiarsummi illukut, Qaqortukuluumi oqaluffikoq aammalu Uunartoq. Taakkua piffiit assigiinngitsut UNESCO Kingornutassiaqarfik KUJATAA-niimmata, KUJATAA Site Managereqarpoq Park Rangereqarlunilu. Taakkua suleqatigilluarneqarput, aammalu ISGmi atorfeqartuullutik. Suli piffiit tallimassaanik aaliangiisoqartissaavoq. ISG 2024-imut piareersaaqataavoq. Tassani Naalakkersuisut kujataani takusassat immikkuullarissut immikkuik ukkatarisussaavaat, avannaa nunattalu qeqqa ukkatarineqareermata.

Anguniakkat pinngaarutillit: piffimmit aallaveqarneq, Atugassarititaasut pitsaasut, UN SDGp umiarsuit takornariartaassuit imminut nammassinnaasumik ingerlanneqarnissaat, pisinnaasanik ineriartortitsineq, ukiup ingerlanerani takornariaqarnerup sivitsornissaa, niuerutissanik ineriartortitsineq, UNESCO & nunatsinni takusassat immikkuullarissut, avammut nittarsaaneq

Kujataani nutaamik mittarfittarnissaq aammalu angalariaatsit allannguuteqarnissaannut tunngatillugu Narsarsuaq nutaamik inissisimalertussaavoq. Taamaammat Narsarsuaq nutaamik nittarsaanikkut ilisarnaaserneqassaaq. Tassaavorli Narsarsuaq immikkut orninneqarsinnaasutut inissisimalernissaa, tikittarfittut aallariartertarfittullu (aqqusaaginnartakkatut) kisimi atuutinngitsoq. Taamaammat immikkut avammut nittarsaanermik suliaqartoqassaaq, takornarialerinermik suliaqartut suleqatigalugit. Tunulliarfik immikkut tikitassaanera, nuannersunik ornitassaqarnera, ilaatigut sermersuarmut pisussinnaanerit, Farm Holiday, amerikkarmioqarsimanerata oqaluttuassartai, orpippassuarni angalaarnerit, immikkullu geologimullu immikkuik tunngasutillit nittarsaanneqassapput. Saniatigut angallassinikkut periarfissat unnuiffissallu immikkut saqqummersinneqassapput.

Anguniakkat pinngaarutillit: tikinneqarsinnaaneq, piffimmit aallaveqarneq, atugassarititaasut pitsaasut, ukiup ingerlanerani takkornariaqarnerup sivitsornissaa, nioqqutissanik ineriartortitsineq, avammut nittarsaaneq, pitsaassutsit imarisai, Explorers by Nature

INUVAP-p piareersaalluni sammisani sivitsorpaa. Tassani piffinni avinngarusimasuni periarfissat unammillernartullu allattorneqarlutik, Immikkut Nanortalimmi eqqaanilu takornariaqarnikkut ineriartortitsineq sammineqarnerulluni. Tassani Nalik Ventures, Visit Greenland ISG-lu suleqatigineqarput. Alloriarnissap tullia SIUARTA-mik taaguuteqarpoq. Periutsip piffimmi amigaatit qitiutinneqarnissaat, inuussutissarsiornikkut pilersaarutit suliarineqarneranni/ siuarsarneqarneranni. Tassani aamma piffimmit qullersaqarfimmut attaveqaatit millisinneqarnissaat anguniarneqarpoq.

Anguniakkat pinngaarutillit: piffimmit aallaveqarneq, piginnaasat amerlisarnissaat, ukiup ingerlanerani takkornariaqarnerup sivitsornissaa, nioqqutissanik ineriartortitsineq

2024-imi Qassiarsuk ukiuni 100-liilluni nalliuttorsiussaaq. Juni 1924-imi nunaqarfik Otto & Tiipaaraq Frederiksenimit tunngavilerneqarmat, aammalu savaateqarfiit (inuussutissarsiutigivillugu) siullersaat pilersinneqarluni. ISGp nunaqarfimmi aqutsisut inuussutissarsiortullu aaqqissuussinissaannik pilersaarusiornerni, siammarterinermik allanillu, tapersersuiniarpoq, taakkua Qassiarsuup eqqaaneersunut takornarianullu tikeraarnissamut pilerinarsaataasinnaammata. Nittarsaaneq siumungaaq ingerlanneqassaaq. Saniatigut Qassiarsuup KUJATAA Kingornutassiaqarfimmut ilaanera, Naalakkersuisullu nunatsinni tikitassat immikuullarissut allattuiffiani ilaanera aqqutigalugit nunaqarfimmi ineriartorneq aamma taakkua tunniussaqarfigisinnaavaat.

Anguniakkat pinngaarutillit: piffimmit aallaveqarneq, UN SDG, nioqqutissanik ineriartortitsineq, UNESCO & nunatsinni takusassat immikkuullarissut, avammut nittarsaaneq

Kujataa angallannikkut angalariaatsinullu tunngatillugu allaannguuteqarfiulerpoq, aamma inuussutissarsiornikkut immikkut piariarfissaqalertussaalluni, kujataani mittarfittaassap ammarneqarnissaa qanilliartormat. Taamaammat angalariaatsit ilaasullu amerlassusaat pillugit piareersarluartoqassaaq, taakkua ataqatigiimmata, aammalu piffimmut tikerartartut amerlinissaat piareersarneqassammata. Timmisartoqarfittaarnissamut takornariaqarnerup inuussutissarsiutitut annertusarneqarnissaa suliniutit ilagilluinnarmassuk ISGp takornarialerinermik pisortaa tassani suleqataavoq. Suleqatigiit aqutsisutut inissisimapput, qaammatillu tamaasa suliniutit, inuussutissarsiortut suleqatigiiffii allat takornarialerisut ilanngullugit, suliniutaat aallaavigalugit ataatsimiittarlutik. 2023-imi inuussutissarsiornikkut isumasioqatigiittoqarpoq, suleqatigiit allat aqutsisut ataaniittut suliassaat sammineqarluni. Kommune Kujalleq tassani ataqatigiissaarisuuvoq.

Anguniakkat pinngaarutillit: tikinneqarsinnaaneq, piffimmit aallaveqarneq, atugassarititaasut pitsaasut, ukiup ingerlanerani takoornariaqarnerup sivitsornissaa

Narsarsuaq piffissami matumani allannguutinik annertuunik piffiuvoq, tassami Kujataani silaannakkut mittarfeqarfittaassap 2025-ip naajartornerani piareernissaa qanilliartormat.Taamaammat allannguutissanut tunngatillugu nunaqarfiup pitsaasumik pilersaarusiorfigineqarnissaa pisariaqarpoq. Tassani ulluinnarni attaveqaqatigiinnermut aaqqissuussinerit aammalu inuussutissarsiortut suliassaqarnissaat eqqarsaatigineqarlutik. Ullutsinni takornariaqarneq Narsarsuarmi inuussutissarsiutit annersaraat, timmisartoqarfillu tassaavoq suliffeqarfiit annersaat. Taamaammat ISGp takornariaqanermut pisortaa sulinermi peqataavoq. Narsarsuarmi suliffeqarfiit takornarialerinermik suliaqartut tallimaapput. Saniatigut nunaqarfiit/savaateqarfiit Narsarsuup qanittuaniittut Tunulliarfimmi takornarialerinermik suliaqartut arfineq sisamapput. Ukiuni marlunni suleqatigiit qaammatit tamaasa naapittarput. Tassani Narsarsuup siunissaa eqqartorneqarlunilu aaliangiiffigineqartarpoq. Naalakkersuisut, Kommune Kujalleq, ISG Sulisitsisullu/GE(inuussutissarsiornikkut peqatigiiffiata immikkoortortaa ilaatinneqarput aammalu namminersorlutik inuussutissarsiortut peqataatinneqartarput aaliangeeqataasinnaanatillu.

Anguniakkat pinngaarutillit: tikinneqarsinnaaneq piffimmit aallaveqarneq, atugassarititaasut pitsaasut, nioqqutissanik ineriartortitsineq, avammut nittarsaaneq, pitsaassutsit imarisai

Ullutsinni isit tamarmik takornarialerinermut sammipput, piffissap sivikitsup iluani amerlanerusunik takornariaqalernissaannik takorluuvisut. Ilulissani, Nuummi Qaqortumilu mittarfittaassat aallaavigineqarneri apeqqutaaginnarlutik. Taamaattoq amerlanerusunik takornariartoqartalernissaa aamma takornariarpassuaqartalernissaa immikkoortinneqassapput. Taakkua amerlasuunit immikkoortikkuminaallutillu isumakuluutigineqartarput. Taamaammat Visit Greenlandi ukiut tallimat iluanni siullermeerluni ulluni pingasuni sivisussusilimmik takornarialerisuk nunatsinni tamaneersunik kateritsitsivoq. ISG tassani DMO-tut peqataavoq oqallisissanik, imassanik saqqummiilluni siunnersuuteqarlunilu. Naapeqatigiinnerup qitiutippaa takornariaqarnerup imminut nammassinnaasumik ingerlanneqarnissaa.

Anguniakkat pinngaarutillit: tikinneqarsinnaaeq, piffimmit aallaveqarneq, atugassarititaasut pitsaasut, UN SDG, nioqqutissanik ineriartortitsineq, UNESCO & nunatsinni takusassat immikkuullarissut, avammut nittarsaaneq, pitsaassutsip imarisai

Kujataa assigiinngisitaartorpassuarnik misigisassarsiorfigineqarsinnaavoq. taamaallaali takornariat aatsaat tikinnissaminnut pilerilersinneqarsinnaapput takusatik atuarsinnaasatillu pigunikkit. Nunat tamalaat akornanni tusagassiuutit (assiliisartut, nittarsaaviit aqqutigalugit naapeqatigiittarfinni sunniutilllit, aviisit pinngortitalerinermik tunngassutillit, bloggerit allallu) suleqatiginerisigut. Taakkua nunarsuatsinni attaveqaaterpassui kujataata nunarsuatta sinneranut avammut saqqummiunnissaannut atorluarneqarsinnaapput. ISGp tusagassiuutilerisut qaaqqusarpai, angalanissaanullu pilersaarusiuuttarlugit; taakkua namminneq kujataa misigisaqarfigalugu, assinik tigooraaffigalugu, eqqarsaatersuiffigalugulu piniassammassuk. Taamaasillutik tusagassiuutimikkut saqqummiussaminnik atuartartumik kujataanut angalasinnaanissaannik sunniuteqarsinnaasarlutik. Tassani Visit Greenland tusagassiornermik suliallit nunanit allaneersut tikinnissaat siunertaralugu suleqatigineqarajuttarpoq. ISGp aaqqissuussineq taava tigusarpaa. 2023-imi tusagassiuutit tikeraarsarneqassapput, makkua qulequttat aallaavigalugit: Farm Holiday, savaaqqiortitsinerup savanillu katersuinerup nalaani, nunatta isuata eqqaani piniartuunerup kulturia, nunakkut psulluni takornariaqarneq, nerisasserineq aammalu juullip nalaa.

Anguniakkat pingaarutillit: piffimmit aallaaveqarneq, avammut nittarsaaneq, Explorers by Nature, pitsaassutsip imarisai

Nittarsaavik www.visitsouthgreenland.com pilersinneqarpoq kujataani takornariaqarnermut paasissutissanik isumassarsianillu aallerfissatut. Tassani tikeraat tikiffissanik paasissutissanilluunnit aallanik aallersinnaapput. Takornariagassaqqissut, takornarialerinermik aaqqissuisartut, unnuiffissat aammalu takornarianik angallassisartut tamakkerlutik tassani allattorsimaffeqarlutik. 2023-mi nittarsaavik assinik nutaanik, assigiinngitsunik qulequtalinnik isumassarsianik imalinnik nutarterneqassaaq, angalanikkut paasissutissat pingaarutillit ataatsimut allaaserisami katersorneqassallutik. Immikkut aamma kujataani nunakkut angalanissamik periarfissanik sammisaqartumik qupperneqassaaq.

Anguniakkat pingaarutillit: piffimmit aallaaveqarneq, avammut nittarsaaneq, Explorers by Nature, pitsaassutsip imarisai, takornarianut paasissutissat

ISGp nittarsaavikkut inuit katerittarfii aqutarivai. @visit_southgreenland Instagram-imi, Facebook-imi og YouTube-imilu atorneqarput.Ukiuni arlalinni nunatta kujataata immukkuullarissumik tikitassaanera assilersorlugu tassani takuneqarsinnaallutik. Ullut tamaasa assit piffinnit tamaneersut siammerterneqartarput, ulluinnarni inuit assilisaat aammalu inuussutisarsiutigalugu assiliisartunit assilisat. Sponsorinit akilerneqartunik aamma saqquummiisoqartarpoq, nunatta avataani atuisut aaliangersimasut assit pitsaasut atorlugit tikinneqarnissaat angujumallugu, naak atuisut inuit nittarsaavikut naapeqatigiittarfianni uagut quppernitsinnik malinnaasuunngikkaluartut.

Anguniakkat pinngaarutillit: piffimmit aallaveqarneq, avammut nittarsaaneq, pitsaassutsip imarisai, Explorers by Nature