Kujataani siunnersorteqarnermik ingerlatsineq namminersortunut piumassusinitsitsisoq

Assiliisoq: Sarah Woodall - Innovation South Greenland

19 Juni 2024

Kujataani sumiiffinni namminersortut nutaamik nukissamillusooq tunineqarput INUVA aamma Innovation South Greenland siunnersorteqarnermik ingerlatsinermi aaqqissuineratigut. 

Siunnersorteqarnermik ingerlatsineq sumiiffinni pingasuni assigiinngitsuni ingerlanneqarpoq, suliffeqarfiutillillu ukunaneersut peqataapput: Nanortalik, Qaqortoq, Narsaq, Igaliku, Qassiarsuk savaateqarfiillu allat. Siunnersorteqarnermik ingerlatsinermi ilaatigut isumassarsiat pilersaarusiallu piviusunngortinneqarsinnaanerat ineriartortinneqarsinnaanerallu sammineqarput. Taamaasiornikkummi suliffeqarfiit allisarneqarsinnaammata.

 Siunnersorteqarnermik ingerlatsineq Inclusive Business Incubator-imik (IBI)-mik taaneqartarpoq, USAID-imiillu aningaasaliiffigineqarluni. USAID tassaavoq Amerikami nunanut allanut ineriartortitsinissamut ingerlatsivik. Kujataani siunnersorteqarnermik ingerlatsinissamut pilersaarusiorneq Resonance Global-imit, INUVA-mit, aammalu Innovation South Greenland-imiillu  aaqqissuuneqarpoq.

Kujataani Inclusive Business Incubator (IBI) mentorprogram naammasseqqammerpoq, siunnersorteqarnermik ingerlatsineq iluatsilluartutut oqaatigineqarsinnaavoq. Suliffeqarfiutillillimmi ingerlatatik siunnersortimut tutsuiginartumut suliatik isumassarsiatilluunniit qulaajarlugit eqqartorluarsinnaasimavaat.

Siunnersorteqarnermik ingerlatsineq qaammatini marlunni ingerlanneqarpoq.

- Alloriarnerit annikitsut pingaarutillit tiguneqartarsimapput, taassuma saniatigut suliffeqarfimmi ineriartortitsinnissamut suliffeqarfinnut ataasiakkaanut oqaloqatiginnittarsimavugut. Siunnersuisullu pitsaasumik nuannersumillu utertiffigineqartarsimapput, tassami namminersortuuneq kiserliornarsinnaasaqaaq, Maria Motzfeldt INUVA-meersoq taama oqarpoq.

Sumiiffinni pingasuni peqataasut:

Ineriartortitsisut pitsaasumik ingerlariaqqissinnaalerput

Siunnersorteqarnermik ingerlatsineq USAID-mit aningaasalerneqarpoq, Kujataanilu siunnersorteqarnermik ingerlatsineq Qaqortumi maajimi aallarteqqaarpoq. Tassani peqataasussat tamarmik najuupput, siullermeerlutillu Shayna Krasnoff Resonance Global-ileersoq USAID tunuliaqutaralugu aaqqissueqataasoq naapillugu.

Aaqqissuusaq siulleq naammassimmat suliffeqarfiutilinnut siunnersorteqarnermik ingerlatsineq aallartinneqarpoq, kingusinnerusukkullu sumiiffinni pingasuni, Nanortalimmi, Qaqortumi Qassiarsummilu najuulluni siunnersuineq juunimi ingerlanneqarpoq. Najuulluni siunnersorteqarneq naammassilluarneqarpoq peqataasullu diplomimik uppernarsaataasinnaasumik tunineqarlutik.

Suliffeqarfiutilinnut ingerlatsinerup saniatigut Nalik Ventures aamma peqataatitaqarput, taakkua kujataani inuussutissarsiornerup qanoq ineriartortinneqarsinnaanera soqutigisaralugu pikkorissaanermi sumiiffinni pingasuni peqataapput.

Kujataani siunnersorteqarnermik ingerlatsinerup naammassilluarnera INUVA-mit iluarisimaarneqarpoq, siunissamilu suleqatigiineq ingerlaannarnissaa neriuutigalugu.

 - Siunnersorteqarnermik ingerlatsinermi Innovation South Greenland suleqatigilluarsimaqaarput, siunissamilu assigiinngitsuni suleqatigiittarnissarput neriuutigaarput. Kujataanimi sumiiffinni suliffeqarfinnik ingerlatsisut assigiinngitsut ineriartortut takusinnaavagut, Claus Christoffersen oqarpoq. 

Siunnersorteqarnermik ingerlatsinermi, tassa IBI-mentorprogrammimi peqataasut 15-it missaanniipput. Aaqqissuussami USAID aningaasaliisuuvoq, INUVA aamma Innovation South Greenland aaqqissuisuupput.

IBI-mentorprogrammip ingerlanerani assit:

Assiliisut: Maria Motzfeldt - INUVA aamma

Sarah Woodall - Innovation South Greenland