Nunalerinermik siunnersorteqarfik nunani avannarlerni savaateqarneq pillugu ataatsimeersuarnermi Finlandimi ingerlanneqartumi peqataatitaqarpoq
Assit: Internorden 2024
All.: Nina-Vivi Møller Adnersen
Nunani avannarlerni savaateqarneq pillugu ataatsimeersuarnermi Internordenimik taaneqartartumi nerlersuinermi misileraanerit qanoq ingerlanneqarneri qanorlu angusaqarfiusarneri ilaatigut saqqummiunneqarput. Ataatsimeersuarnermi Nunalerinermik Siunnersorteqarfimmeersut, Henrik Frederiksen aamma Arnajaraq Svenningsen peqataapput.
- Ullormut pisussat avataatigut oqaleqateqarnerup iluani narsaatit eqqarsaatigalugit ajornaanerusumik savaateqarfinni nalunaarsuisinnaaneq paasisaqarfigaarput. Sumiiffiit ilaanni oqarasuaat atorlugu narsaatini nalunaarsuisarput, uagulli suli pappiliarsorneq annertooq ingerlapparput, taamaattumik allat suleriaasaat takullugit isumassarsiaqarnarpoq. Siunissamilu angorusunnarlutik, Nunalerinermi Siunnersorteqarfimmi pisortaq, Henrik Frederiksen oqarpoq.
Internorden 2024 ukioq manna Finlandimi ingerlanneqarpoq, nunallu ukua peqataatitaqarput: Finland, Sverige, Norge, Savalimmiut, Island Kalaallit Nunaallu.
Ukiup aallartinnerani Nunatsinni savaateqarfinni 36-usuni savat piaqqiortut 15.725-iupput. Savat suminngaaniit akusaaneri nunatsinnilu qanoq savaateqarneq ingerlanneqarnersoq ilaatigut ataatsimeersuarnermi nunatsinniit saqqummiunneqarput. Saqqummiussinermilu ilaatigut ersersinneqarpoq 2030-mut anguniagaq, tassa savaaqqat 28.000-it Neqi A/S-imut akigineqartalernissaat ullumikkut savaateqarneq taama inissisimatillugu angujuminaatsutut isikkoqartoq.
Savaateqarfinnut tunngatillugu nunani avannarlerni ilisimasalinnik avitseqateqarsinnaaneq pingaaruteqartuuvoq. Taamaammat Internordenimi peqataasarnerit Nunalerinermik Siunnersorteqarfimmiit pingaartinneqarpoq, siunissamilu savaatillit peqataatinneqarsinnaanerat eqqartugassat ilagigaat Henriup oqaatigaa.
Naggasiutigalugu nuannaarutigalugu nalunaarutigisinnaavarput Nunalerinermik Siunnersorteqarfimmi pisortaq, Henrik Frederiksen Internordenip Komite-anut ilaasortanngormat. Taamaasilluni nunani avannarlerni nunatsinniit attaveqaataalerluni. Siullermik attaveqaataasimasoq tassaavoq SPS-imi allaffimmi pisortaq, Aqqalooraq Frederiksen.
Henrik Frederiksen pilluaqquarput.
Internorden 2026 Savalimmiuni ingerlanneqarnissaa aalajangiunneqarpoq