Kujataa Arctic Circle Assemblymi peqataatitaqarluartoq
Assit: Arctic Circle
Arctic Circle Assembly ukiumoortumik nunat, suliffeqarfiit, ilisimatuut politikkerillu Issittumi suleqatigiinnissaq aaqqiissutissallu pillugit ataatsimeersuarnerannik taaneqartartoq oktobarip 17-aniit 19-anut Reykjavikimi ingerlanneqarpoq.
Peqqinnartumik nerisaqarsinnaaneq, takornariaqarneq nunanillu allaneersunit Issittumi aningaasaliissuteqarneq pillugit oqallinnernut pingasunut Innovation South Greenlandimi pisortaq, Miki Jensen peqataavoq.
- Nunatta imartaani pisuussutit nunarsuarmi mingutsitsinngitsumik ineriartortitsinissamut iluaqutaasinnaapput. Aamma imaani uumasorpassuaqarpoq, imerput nunarsuarmi minguinnerpaavoq takornariarfissaqqillunilu. Inuussutissarsiutit ineriartortinnissaat inuunermilu atugassarititaasut pitsaanerulernissaat kissaatigaarput. Taamaattumik nunanit allanit suleqateqarnissaq aningaasaliinissarlu soqutigivavut – nunarput, pinngortitarput, kulturerput peqqissuserpullu ataqqineqartillugit, aningaasaliinerillu taakku ataatsimoornitsinnut iluaqutaasinnaatillugit, Miki Jensen ilaatigut ataatsimeersuarnermi oqariartuutimi ilaat annersaat oqaatigaa.
Malik V. Rasmussen: Nukissiuut mingutsitsinngitsoq Kalaallit Nunaata siunissaanut matuersaataavoq
Qair Internationalip qaaqqusineratigut Malik Vahl Rasmussen Kalaallit Nunaanni nukissiuuteqarnissamut periarfissat pillugit kiisalu sanaartornermik suliaqarnermi misilittakkat pillugit Arctic Circle Assemblymi oqalugiartuni ilaavoq. Oqariartuutinilu pingaarnersaat tassaavoq:
- Arctic Circle Assemblymi Kalaallit Nunaata soqutigineqarluarneranik misigisaqaqqippunga, ingammik nukissiornerup erngup nukinganik nukissiornerup tungaatigut periarfissaqarluarnitsinnik, siunissamilu qanoq pingaaruteqartigisinnaaneranik – Kalaallit Nunaannaanngitsumut, aammali nunarsuup sinneranut e-fuels-it nukissiuutillu mingutsitsinngitsut aaqqiissutissatut avammut tunisat pingaarutillit ataanni.
Tusarliussara pingaarnerpaaq tassaavoq, inuit suliffeqarfiillu paasisariaqaraat, nukissiuutit mingutsitsinngitsut Kalaallit Nunaata siunissaanut qanoq sunniuteqarsinnaanersut. Assersuutigalugu Qair Internationalip Maniitsup eqqaani suliniuteqarnissaa siunnersuutigineqarpoq, tamannalu Kalaallit Nunaata avammut tunisassiorneranik marloriaammik annertusitsiinnarnani aammali sivisuumik akissarsiarissaarfiusunik 250-inik suliffissaqartitsissaaq. Tamanna nunatsinnut periarfissatsialaavoq mingutsitsinngitsumillu nutaanik ineriartortitsinissamut pingaaruteqarluni, tassani Kalaallit Nunaat qitiusumik inissisimaffeqassaaq, Malik V. Rasmussen Innovation South Greenlandimut oqarpoq.
Campus Kujallermit takornariaqarnermut ilinniarfiup pisortaa Aaju Simonsen peqataavoq oqallinnernilu assigiinngitsuni oqaaseqarluni.
Nuannaarutigaarput kujataa issittoq pillugu ataatsimeersuarnermi taama sunniuteqarsinnaammat.