Ikiorsiissuteqarniarluni suliaq ingerlateqqinneqarli
Kujataani sikorsuaqarnera pissutigalugu takornarialerisut ikiorsiivigineqarnissaannik suliaqarnerup suliarinerata nanginneqarnissaa Innovation South Greenlandip inassutigaa. Nunatta kujataani takornarialerisut arlallit immikkut ittumik ajornartorsiuteqarput, tamannalu suliffissaarunnermik aammalu suliffinnik matusisariaqalernermik kinguneqarsinnaavoq.
Ikiorsiinissamut itigartitsinerup nunatta kujataani takornarialerisunik ernumalersitsivoq. Allaaserisat tusagassiallu tunngavigalugit itigartitsineq suliffinnik ataasiakkaanik tatiginninnginnermik pissuteqanngilaq imaluunniit ikiorserneqarnissap pisariaqarneranik upperinninnginnermik.
Pissutaapput ikiorsiinissap saqqummiunnerani iliuutsit, ikiorserneqarnissamut immersugassap ilusiligaanera aammalu ikiorsiissutigisassat qanoq agguataaneqarnissaannik sukumiisumik allaaserinnissimannginneq, taamaalilluni ikiorsiissariaqarnerup qanoq annertutiginissaa nalorninarsissimallugu, maannakkuugallartorlu naatsorsueqqinnerit tunngavigalugit ikiorsiissutissatut naatsorsuutit 25 mio- koruunit missaaniinngimmata, taamalu ikiorsiinissamut tunngavissat piviusorsiorsiornerusut anguneqarsinnaalerlutik.
”Qinikkat kajumissaarpagut, suliffinnik ikinnerpaanik annaasaqarnissaq anguniarlugu, ikiorsiinissap piviusorsiortumik ataatsimoorullugu suleqatigiissutigeqqullugu. Ikiorsiinissap tamakkiisup pisinnaalernissaata tungaanut piffissami sivikitsumi akileraanngikkallarnissaq suliffinnut eqqugaanerpaanut oqilisaataasinnaavoq. Taama aaqqigallarnikkut inuutissarsiutip ingerlaannarnissaa kiisalu kujataani ineriartortitsinerup ingerlaannarnissaanut tamanna qulakkeerinnittuussaaq”, taama oqarpoq Innovation South Greenlandimi pisortaq Miki Jensen.
Anningaasanik aqutsineq ikiorsiinissamut akornutaassanngilaq
Sikorsuaqarnerata kingunerisaanik kujataani, ukiuunerani upernaanerani aasaaneranilu immikkut ittumik unamminarsimavoq, taamalu suliassaqartitsiniarneq aaqqissuussiniarnerillu piviusunngortinniarneri ajornarluinnarsimallutik.
Ajornartoriuteqalerneq assersuunneqarsinnaavoq covid 19-neqarnerata nalaani ajornartorsiutaasimasunut, soorlu aamma maannakkut taamaattoq tassa inuit pilersitarinngisaannik ajornartorsiut pilersimammat.
Ikiorsiisariaqalerneq Innovation South Greenlandimiit tapersersussallugu piareersimavoq, ilanngullugulu erseqqissarusupparput siunissaq siusinnerusoq eqqarsaatigalugu iliuusaasarumaartunik tunngavissiortoqarnissaa.
”Ikorserneqaqqulluni qinnuteqaatit sussaaqartunit tamanit suliarineqarlutillu nalilersuiffigineqartariaqarput. Qinikkat qanoq aalajangiisoqarnissaa ukkattariaqarpaat, allaffisornerullu ikiorsiinissamut akornutaannginnissaa qulakkeertariaqarlugu. Kujataani takornariaqarnerup kujataani aningaasarsiutitut ataavartumik ingerlanneqarnissaanut Naalakkersuisut kiisalu Nalik Ventures ikioqatigiilluta suleqatiginissaannut piareersimavugut”, taama Miki Jensen naggasiivoq