Ukioq manna savanik nersutinik tuttunillu toqoraaneq iluatsilluartoq

Allattoq assiliisorlu: Nina-Vivi Møller Andersen

Neqi A/S-imi toqoraaffik naangajalerpoq, pisortarlu Ole Vestergaard angusat pillugit isumalluarpoq. Neqi A/S-imi savaaqqat 268 tonsit, nersutit 23 tonsit tuttullu 39-t toqorarneqarsimapput.

- Ukioq manna toqoraaffik ingerlalluaqaaq. Pilersaarusiorsimasavut naammassisimavagut kinguaattoortoqanngingajalluinnarlutalu, taamaattumik ingerlalluaqaagut, Neqi A/S-imi pisortaq Ole Vestergaard oqarpoq.

Savaaqqat ukioq manna tikiunneqartut ikinnerugaluartut, savaaqqap neqaa ukiup siulianut (2023) sanilliullugu annertuneruvoq, agguaqatigiisillugumi savaaraq 14,4 kg-miit 14,9 kg-mut oqimaallisimammat, pisortaq erseqqissaavoq.

- Savaateqarfinni pissutsit ajorpallaarsimanngitsut tamanna takutippaa, Ole Vestergaard oqarpoq.

Nersutit aatsaat taamak amerlatigisut toqorarneqartut

Toqoraaneq ukioq manna immikkuullarippoq, tassami aatsaat taamak amerlatigisunik nersutinik toqoraasoqarpoq. Nersutit 253-it toqorarneqarput, taama amerlatiginerinut pissutaavoq Narsap Iluani nersutaateqarfiup nersutaatini ikilisarmagit.

- Nersutit 23 tonsit toqorarneqarput, nersutit amerlasuut toqorarneqarnerini tuttunik toqoraasinnaanerput kinguaatoorfiusimavoq. Sila atoruminarunnaarmat tuttunik katersinissaq ajornarsisimammat, Neqi A/S-imi pisortaq Innovation South Greenlandimut oqarpoq.

Ukioq manna tuttut 39-t taamaallaat toqorarneqarsimapput.

Sulisut Skandinaviameersut suleqataalluartut

Neqi A/S-imi toqoraaffiup nalaani ukiut tamaasa sulisussaaleqiffiusarpoq. Toqoraavimmi toqoraaneq annertuumik ilisimaneqarluartumik ingerlanneqartarpoq namminerlu pilersorneq pingaartinneqartarluni. Sulisussaaleqinerlu ukiut tamaasa unammillernartuusarpoq, tassami suliffigisassaq piffissami aalajangersimasumi kisiat pisarmat.

- Sulisussarsiornermi aaqqiissutissaq nutaaq misilipparput, Norgemi Sverigemilu sulisunik arfineq-marlunnik Nordjobb aqqutigalugu tikisitsilluta. Tamanna pitsaalluinnarpoq, piffissami tamatumani sulisussanik naammattunik pissarsiniartarneq ajornakusoornartuaannarmat, Ole Vestergaard Innovation South Greenlandimut oqarpoq.

Neqi A/S toqoraaffiup nalaani nalinginnaasumik 100-t missaannik sulisoqartartoq, maannali toqoraaffiup naalernerani 45-nik sulisoqarpoq, taakkulu neqit nutaarluinnaat piareersarlugit aallartissimapput, nunattalu avannaanut immap sikunnginnerani ilaatigut nassiussassat ulapputigineqarlutik.