Savaatillit arfineq-pingasut Nunalerinermilu Siunnersorteqarfimmiit sanaartornermi siunnersorti, Erik Motzfeldt paasisassarsiorlutik angalaqqammerput. Angalanermi siunertaavoq savat inaat oqorsakkat nutaat alakkartissallugit, suleriaatsit oqinnerusut nerlersuieriaatsit anaajaasarneq/anarterisarnermullu suleriaatsit paasisaqarfiginerussallugit.
Norgemi ilaatigut savaateqarfik alakkarneqarpoq savat inaata iluani allatut inississorneqarnerani nerlersueriaaseq oqinnerusoq atorneqarluni. Tassanimi ullut pingasukkaarlugit savanut ivikkat tunniunneqartarput, kimittuuttorfiillu savap siutaani chip atorlugu tunniunneqartarlutik. Norgemi aamma nunalerinermi systemi atorneqartartoq aalajangersimasoq alakkarneqarpoq, tassani piaqqiortussat amerlassusaat aallaavigalugit kimittuunik nerlersuieriaaseq qanoq ingerlanneqarsinnaanersoq nassuiarneqarpoq. Norgemi aamma ilaatigut savat inaat issittumut naleqqussagaq alakkarneqarpoq, taanna nunatsinnut tulluarnerusuuvoq. Norgemi paasisassarsiornermi ilaatigut nerlersuinissamut akooriviit savanut atorneqartartut aamma takutinneqarput.
Islandimi savaateqarfiit assigiinngitsut aamma alakkarneqarput ilaatigut aamma nunaateqarnermi ilisimatusarfik, Hvanneyri Agricultural University of Iceland alakkarneqarluni. Islandimi paasisassarsiornermi annermik savat inaani silaannarissarfiit qanoq pingaaruteqartiginersut ersersinneqarpoq – savat inaanilu oqinnerusumik suleriaaseqarsinnaaneq sammineqarluni. Bjarteyjarsandurimi ilaatigut savat inaani savat qanoq pitsaanerusumik immikkoortinneqarsinnaaneri takutinneqarpoq – suullu savat inaanik sanaartornermi eqqumaffissaanersut erseqqissarneqarluni. Taamaaliornikkut savat inaani suleriaaseq oqinnerusoq anguneqarsinnaasarmat.
Islandimi alakkagaq kingulleq tassaavoq histiitillit. Tassani hiistit qanoq paarineqartarnersut – atortullu suut pitsaanerusinnaanersut takutinneqarput.
Nunalerineq ineriartortinneqartariaqarpoq – amerlanerusut inuussutissarsiummut soqutiginnilerniassammat
– Norgemi savaateqarfiit qaqqani inissisimaneri uagutsinnut tulluartuusut takuarput. Isumaqarpunga savaateqarneq siumut ingerlassappat savaatiliineq ullumi inooriaatsimut tulluarsartariaqartoq. Savaatilissat tulliuttut sullivinnik kajuminnartunik, pilerinartunik, sanalluagaasunik ukiunut amerlasuunut qulakkeerinnittunnik sulliveqarnissaat pingaaruteqarpoq, periarfissiisinnaasugullu isumaqarpunga. Oqinnerusumik savat inaata iluata sananeqarnerisigut savaatilik savanik marlulisitsisarnissaanut neqigissaarnissamullu periarfissaqarnerulissasoq isumaqarpunga, Erik Motzfeldt oqarpoq.
Savaateqarfiit peqataasut tassaapput: Tasilikulooq, Tasiluk, Ipiutaq, Inneruulalik, Qassiarsuk, Tasiusaq, Qorlortorlu.
Nunalerinermik Siunnersorteqarfik angalanissamut aningaasanik pissarsiornermi ikiortaavoq, aningaasallu Namminersorlutik Oqartussani ineriartortitsinermi suliniuteqarfimmit ilaa akilerneqarpoq, angalanerlu ilaa SPS-mut qinnutigineqarpoq peqataasullu aamma nammineq aningaasartuuteqarlutik.
