Qaqortup illoqarfiata qeqqa, illutoqqat eriagisat amerlanersaasa inissisimaffiat, pillugu borgmesteri ataasinngornerup ualinerani inuussutissarsiortut inerisaanissaanut takorluuilersinniarlugit qaaqqunikuuai. Illut eqqissisimatitaasut Kommune Kujallermit pigineqartut qanoq atorneqarnerusinnaanersut sammineqarpoq – innuttaasunut takornarianullu iseruminartunngortinneqarnissaat anguniarlugu.
Illoqarfiup qeqqani naapisitsineq aallartippoq illutoqqanut angalaanerit. Tassani inuussutissarsiortut takorluuilernissaat aallartinniarlugulusooq – sumiiffik qanoq uummaarinnerusinnaanera takutinniarlugu.
Nunatta katersugaasiviani – katersugaasivimmi pisortaq Inge Bisgaard, European Heritage Awardimik nersornaaserneqarsimasoq, illuutinik eqqissisimatitanik ineriartortitsinermi malittarisassat periarfissallu pillugit saqqummiivoq. Tassanilu assersuumik illutoqqamik ineriartortinneqarsimasumik ullumikkullu nunaqarfimmi uummaaritsitsisumik aamma saqqummiilluni.
Taassuma saniatigut Naalakkersuisut sinnerlugit illutoqqat eqqissisimatitat iluarsaannissaannut najoqqutassiat saqqummiunneqarput.
Innovation South Greenlandip misissueqqissaarnini nutaaq aamma saqqummiuppaa, tassani Qaqortumi unnuiffissat neriniartarfiillu amerlanerusut pisariaqartinneqarnerat ersersinneqarpoq. Taamaasilluni inuussutissarsiortut mittarfissaq ammarpat sissiugassarlu nutaaq atuutilerpat suut illoqarfimmi amigaataalertussat annertunerusumik paasisaqarfigalugit.
