Aasaq manna nuna neriniartitsiviusoq naalluarnerunera pissutigalugu savaaqqat savallu ukiut sisamat kingulliit qiviaraanni neqqarinnerupput oqimaanerullutillu. Savaaqqat toqorneqartut agguaqatigiisillugit 15,5 kiilumik oqimaasuseqarput arnavissallu 18 kiilu missaaniisimasut kisitsisit takutippaat.
Taassuma saniatigut angutikuluuaqqat uummatitassat neqqarissusaannik misissuinermi ukiup siulianiit neqqarinnerusut takutippaat. Nunalerinermi Siunnersorteqarfimmi immikkut siunnersorti, Hans Hansen aamma Saqqaani savaatilik Asiarpa Motzfeldt ukioq manna savaateqarfinni angutikuluuaqqat uummatitassat neqqarissusaannik misissuinikuupput. Scannerinerni kisitsisit aamma takutippaat angitikuluuaqqat uummatitassat neqqarissusaat oqimaasusaallu pitsaanerusoq, naak sumiiffiit ilaanni ataasiakkaani oqileriarsimagaluartut.
-Aasaq manna nuna neriniartitsiviusoq naalluarnerunera savat oqimaaneruneranut neqqarinneruneranullu pissutaaqqataavoq, taassuma saniatigut narsaatini nerukkaatissanik pissarsiviusartuni piffiit amerlanerpaartaani ivikkanik nerukkaatissanik pissarsilluartoqarsimavoq. Savaaqqallu ukiuni kingullerni qulikkaani neqqarissutsimikkut pitsanngoriartornerat kisitsisini takuneqarsinnaavoq, savaatillillu anguniagaqarlutik sulisimaneranik takussutissiivoq – kinguaasiortuutitsillu pitsaanerulersinniarlugit anguniagaqartarsimallutik, Hans Hansen nassuiaavoq.
Tamanna savaatillit suliaminnik pingaartitsilluinnarnerannut tunniusimalluarnerannullu uppernarsaataavoq.
