Nuugaarsummeersoq Tittus Poulsen savarniarnerup nalaani qanoq isorartutigisumik pisussimanersoq malinnaaffiginikuuarput. Taanna ulluni 12-ni 257 kilometerit pisussimavai – ilaatigut qaqqani sivingasoorujussuarni qaqqasiortarsimalluni. Savarniarnermi agguaqatigiissillugu ullormut 21,5 kilometerit pisuttarsimavai.
Ukiakkut savarniarneq aallartikkaangat, savaatillit ikiortaallu ungasissumut ilaatigullu qaqqani imaanaanngitsuni angalasarput. Savarniarnermilu kangerluit isorartuut, qaqqat sivingasuut portusuullu ilaatigut tikinneqartarput – savanik ungoorinerup ingerlanneqarnerani.
Tittup pisuffigisimasai qimerlooraanni savaatillit savarniarnerminni qaammamut 700 kilometerit angusinnaasaraat naatsorsorneqarsinnaavoq. Savaatillilli amerlasuut aamma hiistinik ATV-nillu atuisarput, savallu qimmii savarniarnermi pinngitsoorneqarsinnaaneq ajorput.
Tittus ilaatigut ullup ataatsip ingerlanerani 36 kilometerit pisussimavai, ullullu siuliani 22 kilometerit pisussimallugit. Savarniarneq imaanaanngitsuusartoq takussutissaqalerpoq tassami savarniarnermi ikioqatigiinneq pisariaqarluinnartarmat, inuup ataasiinaanngitsup savarniarneq ingerlassinnaaneq ajormagu. Taamaammat pisunnissamut nukissaqartariaqarpoq, nikallujuittariaqarluni suliamullu piumassuseqartuusariaqartarluni.
Savaateqarfinni savarniartarneq ingerlanneqartarpoq, minnerpaamik septemberip qeqqaniit oktoberip naangajalerneranut.
