Arnat nalinginnarmik angutit suliffigisartagaanni sulilertartut ilinnialertartullu amerlatsikkiartorput.
Taakkunannga ilaavoq Qaqortuminngaaneersoq, Tuperna Johansen.
Tuperna umiarsuarni angisuuni Malik Arctica-mi RAL-ip umiarsuaataani anginerit ilaaniittumi ilaatigut aquttuuneq misilittagaqarfigaa. Irena Arcticami, Sarfaq Ittumilu – umiarsuarnilu minnerni aquttuusarsimavoq. Kiisalu 60° North Greenland umiarsuaatiginikuusaani North Viking-imi aquttuunitut atorfeqarnikuulluni – Europa avannarleq tamaat angalaffigisarsimallugu.
“Ullutsinni umiarsuit piginnaasai imaanaanngitsuupput, usinermi makittarissartarneri nammineq aqussinnaasarput. Pisoqaanerusuni umiarsuarmut usinermi usingiaanermiluunniit makittarissaaneq imaanaannginnerunikuuvoq”, Tuperna Johansen soqutigisaminik oqaluttuarnermini ilaatigut taama nassuiaavoq.
Ulluinnarni angutit akornanni sulineq sungiulluarsimavaa – ullumikkullu arnat immikkut isiginiarneqartarnerat malugineq ajorlugu.
“Siullermik qaarmiusut atorfineqqaarama angutit utoqqasaanerusut isumaqartarnikuupput timiga nukilaanerusoq imaluunniit arlaatigut sanngiinerusunga. Misigeqqinnikuunngilara”, Tuperna oqaluttuarpoq.
Tupernap angutaa umiartortuusimavoq pajuttaatini ilaasortaateeqqanilu naalagaasarluni. Meeraallunili angutini ilagalugu angalaqataasarsimavoq, immamiinerlu pingaartitaralugu.
Imaq inuunermini pingaaruteqartuuvoq
Tuperna ukiut marluk matuma siorna anaananngorpoq, umiartornerlu tunulliuttariaqalerlugu.
“Imaq uannut pingaaruteqaqaaq. Ernertaarama sivisuumik qimaqqasinnaajunnaakkannik, allaffimmiunngoraluarpunga paasivaralu tamanna uannuunngitsoq.
Periarfissinneqarama kujataani immami sulisinnaasunga – nangaariarnanga atorfimmut angernikuuvunga. Taamaasillunga ernera ilagisinnaalerlugu sulilu umiartorlunga”, maanna Disko Linep targanik angallassisartoq oqaluttuarpoq.
Tuperna umiartornermini assigiinngitsorpassuarnik misigisaqarnikuuvoq, pinngortitaq imaanaanngitsoq takullugu, inuit assigiinngitsorpassuit naapinnikuullugit – anorersuarmilu imarsuup sorraasinnaasusaa misiginikuullugit.
“Siullermik umiarsuarmi aquttooqaalerama uniformeqartarneq ippiginikuuara, spagettitortussaallunimi peqqissaarniarsaraluni nerinissaq mersernartarami, naggataatigummi sungiuppara”, illarluni Tuperna oqaluttuarpoq.
Qaqortumut angerlarneq
Tuperna aasaq manna juulimi Qaqortumut angerlarpoq, maannalu Disko Linemi angallammi minnermi, tassa targami aquttuusarluni. Ilaasunit nuannaartorineqartarnini malugisarpaa – meeqqallu nuannarisuugamigit aamma aqunnermik misilitsittarlugit.
“Meeqqat aqutsilaarnissaat nuannarisarpara, meeraallutami ataatatta aqutsittarnikuugamisigut”, Tuperna Johansen naggasiivoq.
Innovation South Greenlandimiit decembarip ingerlanerani arnat inuussutissarsiornermi maligassiuisut angutillu nalinginnarmik suliffigisartagaani sulisartut saqqummiuttartussaavagut. Malinnaalluarisi.
