© Snow Falcon Media – Arina Kleist
Nunalerinermik Siunnersuisooqatigiit ukiumi ataatsimi uninngasimareerlutik, maanna nutaamik siulittaasulerlutik sulinertik aallarteqqissinnaalerpaat. Ukiorpassuarni nunalerinermik suliaqarsimasoq, savaateqarfimmi Kangerluarsorujummik aallartitsisimasoq, Lars Nielsen siunnersuisooqatigiinni siulittaasunngoqqammerpoq. Taassuma pingaartippaa Naalakkersuisut soqutigisaqartullu allat qanimut suleqatigiinnerat nukittorsarneqassasoq inuussutissarsiummut tamarmut iluaqutaasumik.
Ukiuni kingullerni savaatillit ilungersunartorsiorsimaqaat, ilaatigut sila pissutigalugu taassuma saniatigut Upernaviarsummi savaatilinngorniarfik matuneqarpoq – maannalu qanoq iliortoqarnissaa nalunarluni.
“Nalorninartumi massakkut inissisimasoqarpoq. Taamaammat Naalakkersuisut qanimut suleqatiginissai oqaloqatiginissaalu pingaaruteqarpoq, taamaasilluta uagut
siunnersuisooqatigiittut arlaatigut tunniussassaqarsinnaanerluta paasisinnaaniassagatsigu. Suleqatigiinneq ingerlallualertarlunilu unikaallattarpoq,
ajoraluartumillu ukiuni kingullerni suleqatigiinneq unikaallassimavoq. Naalakkersuisulli nutaat neriulluarfigaakka, nunalerinermi ineriartoqqissappat suleqatigiinneq pisariaqarluinnarpoq, Lars Nielsen, Nunalerinermik Siunnersuisooqatigiinni siulittaasoq oqarpoq.
Ataatsimiinermi misileraanermik ataatsimiititaliaq pilersinneqarpoq, Savaatillit Peqatigiit Suleqatigiissut (SPS) pilersinnikuusaat ingerlateqqinneqarluni.
Nunalerinermik Siunnersuisooqatigiit aappaagu februaarimi ataatsimeeqqissapput. Siunnersuisooqatigiinni ilaasortat: SPS, Kommune Kujalleq, Nunalerinermik Siunnersorteqarfik, Neqi A/S, Pinngortitaleriffik aammalu Nunatsinni Uumasunut Nakorsaqarfik Inuussutissalerinermullu Oqartussaafik.
