Innovation South Greenland ulluni marlunni Narsami siulersuisunut isumasioqatigiissitsivoq. Kujataani inuussutissarsiutit annerpaat pingasut sammineqarput: takornariaqarneq, inuussutissalerineq aalisarnerlu.
Isumasioqatigiinnermi ilaatigut Air Greenland, Icelandair, Visit Greenland, Greenland Airport aamma PT Capital saqqummiussipput. Kujataani ineriartortikkusutatik pilersaarutitillu saqqummiuppaat, Qaqortumi mittarfik, siunissami angallannermi attaveqaatit misigisassallu nutaat sammineqarlutik.
INUVA-p Narsami immikkut takornarialerinermi ineriartortitsinissaq pillugu siunnersuisimanertik saqqummiuppaat. Ukiunilu tulliuttuni qanoq ineriartortitsisinnaaneq saqqummiullugu.
Inuussutissalerinermi aalisarnermilu suliffeqarfiit soorlu Neqi A/S, Brugseni, Pisiffik, Royal Greenland aamma Arctic Prime Fisheries peqataapput. Taakkua suliatik siunissamilu pilersaarutertik saqqummiuppaat.
Kujataani periarfissanik ineriartortinneqarsinnaasunik ulikkaartoq isumasioqatigiinnerup takutippaa. Periarfissallu taakkua atorluarneqartariaqarput.
