Qaqortup atuarfiata aneersuartarfiani pinnguartarfik nutaaq ullumi atoqqaarfissiortinneqarpoq. Anitsiarfissuarmi meeqqat hunnorujulikkaat nuannatinneqarput. Pinnguartarfik nutaaq, orpiit ikkusukkat atuarfiullu iluani iikkani qalipakkat nutaat Tasersuup atuarfiani takuneqarsinnaapput. Taakkua piviusunngorsinnaasimapput Kuluk Sinclair-Strômip suliniuteqarnerasigut.
Angajoqqaallu qanimut suleqatiginerisigut aningaasaliisut qulakkeerneqarsimapput. Pinnguartarfinnut aningaasaliisut tassaapput, Paarisa, Grønlandsbanken, RAL, Hotel Qaqortoq aamma Arctic Café. Pinnguartarfiillu ikkussorneqarnerini 60°North Greenland aamma KJ Greenland suliaqarsimallutik. Taakkua aamma atuarfiup iluani qallortarfik – iigarlu arsaaffissaq ikkussorsimavaat.
Taassuma saniatigut nammineq kajumissutsiminnik suleqataasut sulinerisa nalaani Pisiffik aamma Brugseni nerisassaqartitsisarsimapput. Pisiffillu sandkarsimut pinnguassanik aamma tunniussisimalluni.
Pinnguartarfik saniatigut atuarfiip aneersuartarfiani orpinnik ikkussuisoqarnikuuvoq – tassani aningaasaleeqataasuullutik: HK, Innovation South Greenland aamma Stark. Angajoqqaat aamma tassani suliniuteqaqataasimapput.
Nammineq kajumissutsiminni suliaqartut suliffeqarfiillu ataatsimut kivitsineranut qujarujussuarpugut, taakkummi takutippaat suleqatigiinneq qanoq ineriartortitsisinnaanersoq.
