Aalisartut piniartullu pingaartinneqarnerata tulluusimaarutigineqarneratalu annertusarniarlugu sapaatip akunnerata siuliata naanerani Narsap timersortarfiani pikialaarsitsisoqarpoq.
Aalisartut piniartullu pisaavi nutaarluinnaat sassaalliutigineqarput inunnillu isaasoqarluarluni.
-Inunnik aggiasoqarluarpoq, taamaammat aaqqissuusaq iluatsilluartutut oqaatigineqarsinnaavoq. Nerisassat saniatigut aalisartut piniartullu ukiup ingerlanerani kalaalimineerniarfinni akiginiartagaat saqqummiunneqarput – ukiorlu kaajallugu uumasut pisarineqartartut allattorsimaffiat (Inuit Year) saqqumitinneqarluni. Taakkua aamma soqutigineqarluarput paasissutissaqarluarmata, ISG-mi Aalisartunut Piniartunullu nerisassanullu siunnersorti, Erik Kielsen oqaluttuarpoq.
Pikialaarsitsinermi sassaalliutigineqartut ilaatigut tassaapput, puisi, tuttut, tikaagulliip neqaa, kapisilik pujuugaq tarajortigarlu. Suliniummi Innovation South Greenland aaqqissuusisuuvoq, Narsami piniartut aalisartullu suleqatigalugit (NAPP-mi ilaasortat). Pikialaarsitsinermi Inuili nerisassanik kissartitsiinnartartunik tunniussaqarpoq Narsamilu kultorilerisut aamma suleqatigineqarlutik.
Ulluni marlunni nipilersortoqarpoq, mamartukuluunik nerisassaqarluni – inuit ataatsimoorujoorput – pikialaarsitsinerlu nuannarineqarluarpoq.