Qaqortukuluumi oqaluffitoqqap tungaanut pisuffissaq nutaaq sanaartorneqarluni aallartinneqarpoq. Pisuffissaq nutaaq sumiiffimmi ujaqqanit, sioqqanit, issunnit savallu meqquinit suliarineqarpoq. Aqqut taanna nunatta avatangiisaanut tulluarluinnartuuvoq kingornutassiaqarfimmullu illersuilluni. Aqquserngiorneq ukiup tullissaani nanginneqarnissaa naatsorsuutigineqarpoq.
Nunami aqquserngiornerit piujuartitsisut islandimiunit immikkut ilisimasalinnit suliarineqarpoq, suliffeqarfimmit Stokkar aamma Steinarimeersunit. Suliffeqarfik pinngortitami aserortersimasumi aqquserngiorneq ukiuni 20-ni misilittagaa. Suliffeqarfimmik piginneqataasoq, Gudjón Krístinsson siullermeerluni 2020-mi Qaqortukuluumut takornariarpoq, tassanilu qanoq aqquserngiorsinnaanermik isumassarsiorsimalluni. Suliniut ukiuni arlalinni ingerlavoq, coronap nalaa aningaasanillu fondinut qinnuteqarniarnerit kinguaatoorutaasimallutik.
Aqquserngit pisuffissat siunertaraat:
- Utoqqaat pitsorluttullu ajornaanerusumik oqaluffitoqqamukarsinnaanerat.
- Aqqut aalajangersimasoq atornerasigut oqaluffitoqaq, illukut naasullu aserortilernissaanut illersuineq.
- Nunaqavissut immikkut ilisimasallit suleqatiginerisigut piginnaanngorsarneqarnerat.
Sanaartornermi ilinniartitsineq
Inuusuttut Siu-Tsiu-meersut aqquserngiornermi peqataatinneqarput pinngortitamilu atortussat atorlugit qanoq sanaartortoqartarnersoq ilinniarlugu.
”Islandimiut immikkut ilisimasallit pinngortitami aqquserniornermik ilinniartippaatigut, taamaalillutalu periuseq taanna siunissami sumiiffinni allani atorsinnaalerlugu. Inuusuttut peqataanerat immikkuullarippoq nuannerluinnarlunilu. Uagullu aamma immikkut pissarsiaqaqaagut. Taamaalilluta pisuffissanik aqquserngiornermi ilisimasaqalerpugut ingerlateqqissinnaasatsinnik,“ UNESCO Kujataani nunaminertanik nakkutilliisoq, Arnaq Bjerge, suliniummik ingerlatsisoq oqarpoq.
Aqquserngiorneq siammarterneqarumaarpoq
Qaqortukuluumi aqquserngiorneq siullersaavoq allanullu siaruartussaalluni.
“Pisuffissaq nutaaq kingornutassiaqarfinni illersuisussaavoq, tikikkumartunngorlunilu. Qaqortukuluumi aqquserngiorneq siulliuvoq sumiiffinnilu allani aamma sanaartortoqartussaalluni,” Arnaq Bjerge oqarpoq.
Aqquserngiorneq piviusunngorsinnaasimavoq Augutinus Fonden aamma Mikroinfrastrukturpuljen aningaasaliisoralugit.