Ivy Qaqortumi nuannarineqarluartuuvoq, Pisiffimmi sulisoq naapinneqartuartarpoq utoqqaallu sapaatit tamaasa oqaluffimmi naapitaraat. Nipiliortuunngilaq – kisianni sumiluunniit najuuttuarnera nuannarineqarneranut pissutaavoq.
Ivy Filipinneriniit 2023-mi oktobarimi siullerpaamik Qaqortumut tikippoq – Café Kûnguamut suliartorluni.
Ullumikkut Pisiffimmi sulivoq, inuiaqatigiinnut akuulluarpoq nunaminilu pisiniarfiit arlallit namminersortutut aamma ingerlallugit. Eqqissisimasutut isikkoqartup tunuliaqutarai inuuneq akisussaaffilerujussuaq, tamaviaarluni suliffeqarneq allanullu tunniusserusussuseqarneq.
-Nalunngilara pissaaleqiffiusumi inuuneq qanoq ittuusoq, taamaattumik sukataarlunga sulisarpunga, Ivy oqaluttuarpoq.
Juulli qallilluinnarpoq, inuit poortugarsiniarlutik nerisassanillu niuerniarlutik ulappupput, angerlarsimaffinnilu pikineq aallartilluareerpoq. Ukiup ingerlanerani ilaqutariit ikinngutigiillu ataatsimoortarfiat, asanninnermik ulikkaartoq. Ivy Qaqortumi juullisioqqaarnini ima eqqaamasaqarfigaa:
-Qaqortumi juullisioqqaarama kisimiilluinnarpunga, tassani eqqarsarpunga angerlartariaqavissorlunga. Ullumikkulli sungiunneruara ukiummi tamaasa nunannut tikeraartarpunga, Ivy oqarpoq.
Tunniussaqarneq nukiuvoq
Ivy 16-inik ukioqaleramilu imminut pilersulerpoq. Nunaatilinni peroriartorpoq, angajoqqaai tamarmik nunaatiliullutik. Taamaammat inuunermini sulineq qanoq pingaaruteqartiginersoq mikinerminiit ilisimallualersimavaa:
-Imminut pilersorlunga aallartikkamali meeqqanut avinngarusimasumi peroriartortunut nerisassiortalerpunga. Meeqqat utoqqaallu orpippassuarni inuusut iggattarsimavakka. Upperaarami tunniussaqarnermi arlaatigut utertiffigineqartartugut. Tamanna uannut nukimik tunisisarpoq.
Nunatsinni inuit ulluinnarni aqqusinermi ilassiortarnerat immikkuullarissutut Ivyp misigisarpaa. Apummillu takunissaq attuinissarlu meeraallunilu sinnartorisarsimallugu, tamannalu ullumikkut piviusunngorsimavoq.
Arnaq Filippinerini niuertoq
Ivy 16-inillu ukioqalerami ulloq unnuarlu sulisalerpoq. Ilinniarnissaq unitsinneqarpoq aningaasarsiortariaqarami. Kigaatsunnguamilli nunamini niuertarfimmik inerisaanini aallartippaa.
-Siullermik atisaarniarfinnguamik ammaavunga, maanna niuertarfiit sisamanngornikuupput tallimassaallu erniinnaq ammartussaalluni. Coronap nalaani atisaarniarfik matusariaqarsimavara niuerniartarfittullu allartinngortissimallugu, coronap nalaanimi ilisimaaraara inuit niuerniarfigisinnaasaminnik amigaateqassasut, Ivy oqaluttuarpoq.
Niuerneq tassaanaanngilaq sulineq – aamma inuunermik ataatsimoornermillu nassataqartartoq, Ivyp naqissuserpaa.
Arnaq suliumatooq Qaqortumi Pisiffimmi naatitanik paarnanillu tuniniaanermi annertuumik sunniuteqarsimavoq. Tassami Qaqortumi 2024-mi aamma 2025-mi nuna tamakkerlugu Pisiffiup pisiniarfiini tamani paarnanik naatitanillu tunisat amerleriarujussuarsimapput. Tamanna tunngavigalugu Ivy Pisiffimmi siulersuisunit immikkut nersorniarneqarsimavoq.
Annertuumik suliniuteqartarnerata pisiniartartuniit suleqatiminiillu maluginiarneqartarpoq nuannarineqartarlunilu. Nerisassat igiinnarneqannginnissaat annertuumik sulissutigisarpaa ilaatigut akikilliliilluni naatitanik immikkut poorsisarnermigut naatitanik immikkoortiterisarnermigit pitsaasumik akigisaqartarluni.
Juulli eqqaamasanik eqqaasitsisarpoq – maqaasisaqarnermik ataatsimoornermillu imaqartarluni. Ullumikkut Ivy juullimi nammineq periutsimik nassaarsimavoq. Qaaqqusisarpoq inunnillu ataatsimoortitsisarluni.
-Sumiluunniit juulli ataasiuvoq, nunarsuarmi sumiluunniit ikkaluarutta. Juullimi tamassi pilluaritsi, Ivy naggasiivoq.
